12/3/2020

台灣宅宅環島之旅:逆時針篇 Day 8 回家了

真正嘅最後一日,因為我哋係下晝兩點幾嘅飛機,所以朝早九點左右我哋懷着極度依依不捨的心情離開民宿。
住咗兩日嘅民宿~
不過今次我哋選擇去桃園機場嘅方式有啲唔同,既唔係巴士,亦都唔係機場捷運,而係台灣高鐵,而且我哋仲要選擇咗商務位。雖然只有短短二十分鐘嘅旅程,但係估唔到除咗飲品之外仲有提供小食,雖然差唔多要成四百台幣而且只係去到桃園高鐵站,仲要自己轉車返去桃園機場,但係如果下次有機會我都寧願搭高鐵進出台北,因為相比機場捷運真係舒服好多。正如我頭先咁講,去到桃園高鐵站之後仲要轉機場捷運返去桃園機場,不過好彩嘅係有高鐵桃園站行去機場捷運桃園站沿途都有升降機,真係好方便。


去到桃園機場之後,第一樣野我哋唔係去check-in,而係去第二航站手信街買手信。咁多日以來我哋都無諗過係出面買手信,因為一來除咗怕拎之外二來就係係機場買可以退稅,雖然唔係好多,不過有好過無,而且佢仲幫你入盒包好,方便寄倉。


台北桃園機場環亞貴賓室第一航站C區
咁之後買完,就梗係過返第一航站check-in。入到禁區,我哋就梗係入去環亞貴賓室抖番陣先上機啦,其實最主要都係因為我哋連早餐都未食。入到去攞完嘢食,終於可以試到我呢幾日一直以來都試唔到嘅嘢,就係台灣啤酒,因為要揸車所以我都好節制。


到飽晒,瞓多一陣,終於夠鐘上飛機。因為我哋預計因航只會提供著名嘅因航卷,所以我哋喺貴賓室已經食到飽晒,同埋因為我真係好憎食因航卷,所以我一早揀咗轉食猶太餐。因航猶太餐竟然都係提供完整一個餐,如果鍾意食炸魚其實應該會幾開心,因為主要係食炸魚同埋薯條,同埋仲有一塊朱古力同埋一個撻,相比起乏味嘅因航卷真係好好多。


又係因航Www

隨着飛機逐漸同香港水平面拉成直線,我哋亦都知道今次嘅旅程亦都正式畫上句號,希望下一次有機會可以再去台灣環島,如果有機會我真係覺得大家應該花啲時間去台灣環島一次,因為中間有好多地方真係唔可以用言語形容嘅美麗。

(本文同時載於Medium)

10/3/2020

台灣宅宅環島之旅:逆時針篇 Day 7 台北一天遊


如是者,咁我又過咗一日。嚟到第七日,今日有個台灣朋友嚟帶路。咁佢哋搵咗我哋之後就梗係去食早餐先啦,我哋間民宿位於迪化街附近,原本我朋友諗住帶我地去食早餐,但係睇完之後都覺得唔係好啱所以又係便利店解決。


西門町芒菓冰
跟住就行咗去西門町,第一站,西門町雜誌瘋,其實講白啲咪又係去買動漫相關書籍同埋精品。喺嗰度敗咗百幾蚊台幣之後,咁就出發去第二站,因為我早餐淨係飲咗盒奶所以都幾肚餓,所以我朋友帶咗我哋去食芒果刨冰(好似係叫西門町芒菓冰)。望吓個鐘嗰陣時只係朝早十一點,忽然之間覺得自己都好癲。食完炮兵咁就去咗西門町旁邊小路一間好懷舊嘅CD鋪(好似係叫95樂府)。點解用懷舊形容?因為入邊除咗真係黑膠碟之外仲有好多擺到發黃等人買返屋企嘅CD,當中亦都不乏唔少歷年動漫大作,例如K-on同埋涼宮春日。

戰利品?
當然,喺西門町,梗係冇理由唔去埋虎穴同埋Animate。雖然我係虎穴淨係買咗比村乳業嗰本月曜日のたわわ。但之後去到Animate,我又買咗千幾蚊台幣喺度買嘢,當中仲要有唔少係希萌創意出品(謎之音:喺高雄咪買咗,點解仲要返台北買)。

因為跟住都冇地方好去,所以就暫時返咗民宿休息。作為打發時間嘅最佳夥伴,就梗係鋤大D啦。咁啱我哋個台灣朋友唔識玩,咁就順手教埋佢玩。

中Size牛肉麵
歡樂嘅時光總係過得特別快,玩咗唔知幾多舖輸咗唔知幾多錢之後,開始覺得悶,所以就走咗去台北地下街Y區,又係去睇下啲動漫精品,打咗陣MaiMai,結果我又敗咗兩隻點兔巨趴返香港,如果唔係香港搵唔到真係唔想買(又要陪佢哋照X光,又要瞓飛機上面果個行李擺放箱,無風景睇,對唔住智乃Www)。之後又要好好去搵嘢食。今次我哋選擇咗一間都幾特別嘅牛肉麵店,就係位於西門町側邊嘅建宏牛肉麵店,牛肉麵店就有千千百百萬間,點解要揀呢間?無,因為同行台灣朋友話呢間比較好食,佢食過咁多間都係呢個係唯一一間會食過返尋味。既然佢都咁講咁我哋無理由唔試啦?果然,食完之後真係覺得幾好食,有機會真係想返去食多次,而且仲有分大中細size,真係適合唔同胃口大細嘅人。(利申:之前食牛肉麵只係喺桃園機場上機或者轉機之前喺貴賓室食過)

滷雞飯
食完咁就出發去喺台灣最後一日行嘅夜市,就係寧夏夜市。雖然呢度就剩係得一個路口大細嘅夜市,不過當中食嘅嘢都好多而且無乜點重複。滷肉飯可能大家聽得多食得多,滷雞飯呢?呢度有一間夜市嘅鋪頭係以滷肉和滷雞飯為主,講真我去台灣咁多夜市真係第一次見到有滷雞飯,作為一個鍾意中伏嘅人,咁梗係無理由唔去試啦。如果你問我食完有咩感覺,我會話起碼無滷肉飯咁甜,同埋因為佢將啲雞整成試所以咬落都幾好味,因為吸收晒汁嗰啲精華。

食完夜市,咁就返民宿休息。我諗咁樣完結今次呢個旅程都無咩地方唔完美。

8/3/2020

台灣宅宅環島之旅:逆時針篇 Day 6 正式開始台北宅人之旅?

真。麥當勞歡樂送
第六日,都仲係迷迷糊糊嘅時候,就比個電話嘈醒,佢話喺麥當勞歡樂送,我幾驚佢係黎查水錶。結果我先醒起前一日民宿主人同我地講佢會包早餐,估唔到喺麥當勞。咁攞完早餐之後就快快脆脆刷牙洗面跟住食早餐。因為今日行程就係玩車同埋去台北所以晏小小出發都無問題。
十分老街
不過既然有架車,又未夠鐘玩,咁難得喺宜蘭點解唔順路去埋十分放天燈?咁於是我哋就上車出發去十分。經過雪山隧道之後,我哋就信咗Google Map,落公路跟住行山路,早知就唔信,一早睇清楚地圖先出發,因為嗰度同上大帽山條路差唔多,而且仲要行成二十公里。最終有驚無險到達十分。搵個地方停好車之後就行返過去十分老街放天燈,可惜天公不作美,落着毛毛細雨,不過好彩都仲放到天燈。不過既然都落雨,快快脆脆放完天燈只可以走,希望下次有機會再嚟欣賞風景。


既然係咁,就出發返去桃園機場還車。唔好問我點解唔會揸車入台北擺低行李先,因為揸車入台北係一件好麻煩嘅事,同埋我覺得係台北揸車除咗要勇氣之外亦都好恐怖,因為實在太多電單車。


還完車之後,咁就搭返機場捷運返台北。雖然時間有啲早不過我哋選擇直接去入住嘅民宿。今日住嘅民宿就幾特別,係一間串燒店入面,串稻-大稻埕串烤居酒屋。民宿地下係一間串燒嘅鋪頭,一樓就有間精品咖啡,同埋有人喺度彈結他,二樓三樓就係民宿。雖然要共用廁所,但係房間其實都算大同埋舒適,唯一美中不足係隔音實在太差,半夜有人行過都聽到出邊啲聲。


安頓好之後,發現已經差唔多六點,咁就出發去食晚餐。今日我哋難得返到台北,梗係要去食女僕Cafe,今次揀咗位於台電大樓站旁邊嘅Crescendo 可蕾仙朵女僕咖啡館(詳細食評請按此)


食完女僕Cafe,返到台北,咁梗係要去我最鍾意嘅夜市,公館夜市啦。雖然嗰度得好少鋪頭未必稱得上係夜市,或者可以叫做商圈,但係我鍾意嗰度除咗係因為比較少遊客去之外,亦都係因為真係好平,可能係因為隔離就係國立台灣大學嘅關係?


公館夜市--蜂蜜檸檬
公館夜市對我來講每一樣都係美食,不過佢嗰個印度薄餅真係好好食,每次去都必定幫襯。而我朋友每次去都一定會點地瓜波,因為呢度真係好平同埋好大份。


食到飽晒,我哋今次無選擇搭捷運,而係選擇搭巴士返去民宿,不過真係好後悔,因為Chok 得好緊要,不過順順利利返到去就唔好要求咁多。

4/3/2020

台灣宅宅環島之旅:逆時針篇 Day 5 蘇花公路初體驗

瞓醒又一日,不過今日起身係開心嘅,因為終於唔使再食便利店早餐,今次去食酒店提供嘅自助早餐。好老實,作為一個成日周圍飛嘅人,本身對酒店早餐都唔係太有好感,諗住食飽就算。但係呢度絕對令我喜出望外,除咗款式多之外,味道亦都好好。


超豐富早餐~
食飽飽又要出發喇,不過係開始蘇花公路體驗之前,一樣更重要嘅嘢,人會口渴,車都會口渴。望下個油標,發現得返四分一缸多少少,既然蘇花公路沿途都無油站,咁梗係入咗油先正式挑戰。


喺花蓮機場進入台九線嗰一刻,我心諗:好簡單姐條路,結果,我錯了。一過咗太魯閣國家公園大橋,就開始長達兩個鐘嘅九曲十三彎之旅。(我去嗰陣蘇花改淨係開咗蘇澳至東澳段)


沿途不停上山下海,下刪五百字,雖然沿途風景真係美不勝收,尤其是清水斷崖果段,不過亦都真係好傷神,所以我淨係揸到東澳出口就搵個地方換司機。沿途嘅風景我真係唔知點樣用文字形容,有機會真係要親身體驗一次(不過當然唔係揸嗰個,因為真係好傷神)


去到宜蘭,梗係唔可以唔去浸溫泉喇。不過浸溫泉之前梗係食少少野先。去到宜蘭礁溪溫泉區附近,諗住搵個地方食晏晝,點知停低架車之後發現附近好多地方都係無開或者太貴,咁所以我哋又係去咗便利店解決。


喺便利店求其食啲嘢之後,(台灣便利店真係好高質,就算食微波爐叮飯都好食過香港唔知幾多倍)我哋就出發去礁溪溫泉公園-森林風呂。至於點解揀呢度,都係因為平,一百蚊台幣就可以浸到溫泉,不過條件就係要全裸,唔緊要啦反正都係男女分開有乜所謂。如果你問我浸完有咩感覺,其實咪又係溫泉一個,不過呢度好似無乜硫磺味。


成幢都係我哋住Www
正所謂浸溫泉唔可以浸太耐,如果唔係好易會頭暈。咁所以我哋浸左九個字左右就出返嚟揸車去今晚嗰間民宿,位於國度五號宜蘭出口旁邊嘅灣客棧。至於揀呢間民宿,除咗因為我哋可以包晒三層樓之外,而且我哋之前同屋主溝通過,可以加錢燒嘢食,咁我哋梗係唔執輸啦。未去到之前,以為係香港嗰啲單幢式村屋大細,一層大約七百呎;但一去到,一層都過千五呎,真係開幾台麻雀都夠。每層樓都有廁所,一間雙人床房同埋一間單人床房,不過問題就係WiFi 只係喺地下收到,一樓以上係完全收唔到。至於燒嘢食,屋主為我地準備咗新鮮嘅海鮮同大量肉類美食,仲有個煲同湯底,咁我哋梗係又燒嘢食又打邊爐啦(如果你鍾意買餸去煮都得,因為除咗電磁爐仲有煤氣爐提供)。不過既然都食到咁飽,就梗係唔使去夜市。夜晚食完梗係打返四圈先瞓覺啦~





(Day 5 行車路線)(本文同時載於Medium)

2/3/2020

台灣宅宅環島之旅:逆時針篇 Day 4 一日遊走大半個台灣東部

民宿望出去風景
黎到第四日,我諗我都食厭咗便利店早餐,所以就落樓下睇除咗便利店之外有咩選擇。但好遺憾嘅係開嘅鋪頭其實唔多,結果行下行下,搵到間不知名嘅漢堡包店,食咗幾日便利店早餐終於可以揀下其他選擇。拎到返民宿食,坐喺個露台,望住個一望無際嘅風景真係賞心樂事,雖然個漢堡包同麥當勞嗰啲好食好多,不過可能因為我哋太着重欣賞風景所以個飽其實咩味我哋都唔記得Www

喺離開墾丁之前,仲有一個地方我哋要去,就係全台灣最南點嘅鵝鑾鼻。老實講其實我對呢度有少少失望,停車場落車之後要行十五分鐘過去,之後過到去就只有一個平台和一個不知名的雕像,雖然影相風景係靚,不過就唔知點解睇完之後有種空虛寂寞感覺。
海天一色伸延無限~
既然都無乜特別,做下遊客影張相打個卡咁就走,繼續趕路。雖然今日大約只有唔夠三百公里嘅路程,不過因為要進入台灣東部嘅山區,所以我哋預計係都要預五至六個鐘先去到花蓮。如是者,我哋一路行一路行,經過台九線(嗰陣時南迴公路改善計畫仲未開通),慢慢地由山區去到海邊。一望到海果刻,做緊柴可夫斯基嘅我忽然之間覺得揸咗咁耐車一切都值得。嗰一刻個風景其實唔可以用三言兩語去形容,有機會真係值得大家嘅親身去體驗下。

Yummy~
去到台東市區都差唔多兩點,今朝又一早食完早餐,我又覺得肚餓。原本我哋諗住去到花蓮先食,但係見到去花蓮仲有成兩個鐘車程, 所以焗住無奈求其喺台東搵間餐廳食。不過可能已經過咗食飯時間,一路去台東途中都叫同行朋友打電話去問,好多店舖都話下午休息晚上先繼續開。所以當初我預計會食到好嘢。臨出發之前上網搵過話台東池上嘅米好好食,所以我哋最後用咗好耐先搵到一間食池上米便當嘅餐廳,就係全台灣都有分店嘅台東東池池上便當。當初以為好貴,結果最貴都係一百蚊台幣左右。我哋五個人,所以就一人叫一款,啱啱好五款。不過因為我哋揸住架車無得停低食飯,所以我哋選擇咗去附近嘅鐵路藝術村停車場食。可能因為我哋第一次食同埋好肚餓,所以覺得好好食,同埋仲有碗湯送,所以覺得真係大件夾抵食。
下晝五點嘅路況

食完野,抖一抖,望下個鐘,都已經三點半,再唔出發真係夜晚都去唔到花蓮。台東去花蓮有兩條路,分別係近山邊嘅台九線,同埋近海邊嘅台11線。既然之前見到嘅海景咁靚,咁我哋梗係繼續行海線啦。果然不負眾望,沿途風景美不勝收。由一朝早揸車到而家,我已經揸咗差不多合共六個半鐘,係時候換人。跟住行多一陣,發現周圍已經天黑,沿途唔好話街燈,連人和車都見唔到,跟住我以為我哋已經係夜晚八、九點左右,跟住睇吓個鐘先發現原來啱啱過五點,仲有成個鐘先到花蓮。台11線差唔多去到花蓮之前需要上山同過幾條隧道,依家諗返轉頭都覺得嗰條路好恐怖。好彩,過完嗰度之後我哋就見到有高樓大廈和街燈喺度迎接我哋,即係話俾我哋知安全到達花蓮。(唔知點解果刻有啲感動到喊)



其他
蒸包類
去到花蓮,我哋選擇咗入住成旅晶贊-花蓮假期酒店,一入到房,發現間房真係好大好靚。不過大同靚都無用,因為我哋晏晝淨係食咗個便當,所以又覺得肚餓。一講起花蓮,就唔可以唔試著名嘅蒸餃。我哋行程之前有台灣朋友建議我哋一定要去試吓周家蒸餃,咁所以我哋喺酒店安頓之後就快快脆脆揸車出去。好好彩搵到車位,之後就諗住去位於公正街嗰間周家蒸餃。結果去到發現休息,既然咁難得黎到花蓮,無理由就咁放棄,咁所以我哋好徒步行去一公里外的周家蒸餃花商店。好彩皇天不負有心人,好順利我哋去到佢係有開。跟住叫咗蒸餃小籠包水餃等等,同香港嗰啲完全無得比,簡直係兩個唔同層次,有機會真係要值得自己去試吓。

雖然食完都差唔多飽晒,不過既然喺台灣又無理由唔去夜市,所以就去咗自強夜市同東大門夜市,不過去到發現其實唔係好啱我食,唔係話我唔鍾意食海鮮,而係我已經差唔多飽,所以我哋睇完就算,揸返架車返酒店休息,準備聽日挑戰蘇花公路。

29/2/2020

台灣宅宅環島之旅:逆時針篇 Day 3 一路向南發大財

樓高五層嘅sir滑梯
經過咗一晚之後,瞓醒又準備食早餐。正如之前都喺度講,方圓1公里範圍除咗得間7–11之外就乜都無,咁所以早餐又係要便利店解決。食完早餐就上網check下想去嘅景點有無開,好遺憾地想去嘅七股鹽山維修中,所以只可以改第一個去嘅景點:高雄國立科學工藝博物館。  

你可能會問,做乜無端端走去行博物館?咁當然除咗消磨時間之外,亦都係因為想去睇吓嗰個交通館。對我來講其實就因為自細都對呢啲有興趣,所以每逢去親旅行都會搵吓有無呢啲地方行。我行完之後當然好滿足,不過同行嘅朋友就被令一樣野吸引住,就係樓局差唔多十層樓嘅sir滑梯,佢哋應該係嫌前一晚民宿唔夠喉,呢條樓梯佢哋可以玩到夠,sir 完之後就玩埋嗰啲槍game。 


美麗島站光之穹頂
跟住參觀完又肚餓啦喎,難得去到高雄,除咗發大財之外,作為一個宅,有一個地方我一直都好想嚟朝聖,就係高雄閱讀女僕咖啡本館(詳情請參閱此篇食評)


食完野,離開高雄之前,仲有一個地方係要去,就係美麗島站。對我地來講除咗係睇嗰個光之穹頂之外(去到先記得要帶支魚眼鏡去(~_~)),就梗係要去買高捷少女嘅精品。明明台灣Animate 有得賣,但係我都係覺得去到嗰度買好似正宗啲?xD 


發完大財,上返車嘅時候已經差唔多四點,跟住就即刻飛落去墾丁住。原本我哋諗住落到去墾丁大街只係六點左右,結果一路揸一路一揸,去到嘅時候已經差唔多七點半。去到都唔係最大問題,而係我哋預訂嘅貝殼灣度假旅店本身就有提供車位,但我哋搵咗成十分鐘都搵唔到個入口喺邊,所以要叫個民宿主人落嚟帶我地入去,果下都咪話唔老尷。民宿位於墾丁大街,不過就無電梯,一上去首先要行一層樓梯,跟住我哋嘅房間安排咗喺三樓,即係又要行多兩層樓梯,好彩我拎個篋得3Kg,唔係都幾辛苦。一入到房,話大唔大話細唔使,不過有個露台,幾好。諗住出去睇吓有冇風景睇,但係需要諗起已經係夜晚七點九左右,除咗樓下果夜市同埋星空之外真係睇唔到風景,因為真係好黑。  


另外叫的小食
左邊:正常size 右邊:大胃王挑戰size
不過唔緊要,聽日睇一樣。搵咗嘢醫肚先,因為我哋真係好肚餓所以就唔諗係夜市解決。行下行下原本諗住要頹到喺麥當勞解決,結果喺隔離見到間拉麵店,咁就諗都唔諗沖咗入去。同行有朋友挑戰拉麵店個大胃王挑戰,當然結果都係失敗啦,不過都幾開心,拉麵啲味道都幾好味。  

咁我哋食完一碗拉麵,當然梗係要留返個肚食夜市啦。可能大家都有上網睇過,好多人都話墾丁大街係全台灣最黑心嘅夜市,即係最識得劏遊客嘅夜市。其實嗰陣時我哋係抱住期待嘅心態去幫襯,可能因為你自己鍾意中伏?行咗一陣,其實發現都唔係話特別貴,甚至乎屋價錢亦都有啲親民,可能因為平日緣故?不過相比起同我更加需要一杯嘢飲,所以我買咗杯蜂蜜檸檬就算。跟住喺便利店買多個雪糕返民宿食,咁樣完結今日嘅行程就好完美。


27/2/2020

台灣宅宅環島之旅:逆時針篇 Day 2 中壢去台南 碰釘日?

當初訂酒店諗住見咁平有包早餐可以慳返啲早餐錢。第二日,一起身,諗住落樓下食個早餐先出發,結果望完之後,我都係決定早啲執嘢上車,揸車去搵間便利店解決。結果退咗房,之後求其喺便利店買咗份三文治喺架車度食完之後就正式出發。

正當我地懷着滿腔熱誠準備出發嘅時候,發現原本我哋第一個地方想去嘅章化扇型車庫公休,所以唯有更改行程。我哋嘅第一站變咗去台中嘅安美利特,即係Animate。本身諗住台中物價比台北低,應該會比台北嗰間大啲掛。結果係,如果用樓層黎講佢的確係多個台北,不過大細同台北比絕對差好遠,真係細好多(同沖繩嗰間應該有得比)。

結果係入邊消磨左十五分鐘之後就行完出返嚟,跟住我又肚餓,結果走咗去食SKR動漫時刻娛樂餐廳。(詳細食評請按此)

西港外婆家民宿(五人房)
食完離開嘅時候已經差唔多三點,跟住急急腳上返架車就揸車去民宿。我哋選擇咗位於台南西港區嘅西港外婆家民宿,不過呢間民宿絕對唔係因為平,而係因為佢每間房都有唔同特色,我哋今次入自己房係有”sir”滑梯㗎(忽然間覺得自己好童真xD)。搞掂check-in,一入到房,發現真係好大,同官網上面相片比真係爭好遠,不過得一個廁所,五個大男人朝早爭廁所用Www。同埋沖涼嗰度喺樓梯底,對於我哋呢啲個個身高都180 cm以上嘅來講其實都幾辛苦。

永大夜市
參觀完示範單位又未夠鐘去食晚飯,見仲有少少時間所以就諗住揸車去附近嘅七股鹽山參觀,結果臨出發前上網一睇,又係公休日,最慘就係嗰度方圓一公里範圍內剩係得間7–11。咁所以我哋早啲揸車出去搵食。台南唔係每一個夜市日日都開,結果我地又揸咗成半個鐘車去夜市。今次我哋去咗永大夜市。老實講,咪又係夜市一個,夜市應該有嘅嘢都有。面對選擇困難症嘅我,因為我實在太肚餓,所以揀咗去食夜市鐵板餐。價錢唔貴,又大份,仲要有意粉薦底,食完都已經差唔多飽晒,跟住求其搵多杯嘢飲咁就返去民宿 休息X 鋤D〇

(Day 2行車路線) (本文同時載於Medium)