21/2/2020

台灣女僕cafe體驗:高雄 月讀女僕咖啡

一講起高雄,大家除咗諗起高雄發大財同韓國魚之外,作為一個宅,更加有一個地方係應該好多人都想來朝聖,就係月讀女僕咖啡。作為一間台灣元老級嘅女僕Cafe,我相信唔理台灣好香港好日本好多都好多人聽過佢個名,亦都有好多人想去朝聖。我相信要喺台灣屹立超過十年嘅女僕Cafe真係唔容易,而我好好彩有機會去過兩次,仲有一次係聖誕節特別活動。


聖誕特別版前菜
月讀女僕咖啡位於舊高雄火車站旁邊,離遠已經可以見到外牆”月讀”嗰兩個字。由門口未入去果一刻已經可以感受到,瀰漫着一種哥德式嘅建築風格;入到去店裡,除咗見到有吧枱之外亦都有幾張大枱方便唔同人數嘅客人。由地下地板到牆壁再到天花裝飾,都係一種哥德式建築嘅風格,堂皇得來又唔會有太古舊感覺。由建築風格黎睇已經係都算係一種幾特別嘅體驗,同台灣其他女僕Cafe相比,絕對係一種與別不同的感覺。(不過有無耳目一新或者懷舊嘅感覺就見仁見智)


食物方面,其實真係完全唔使擔心。有超過十五年嘅經驗,食物方面可以完全用頂級來形容。先講吓平日果啲,有咖喱飯同埋丼飯選擇,份量係非常足夠,而且十分美味。而且即叫即做,十分新鮮。不過正因如此,等候時間亦都比較長;至於特別餐,其實只係加咗餐湯同沙律,不過個沙律真係好有驚喜,相比起普通就咁椰菜沙律,佢嗰度都有成四五種配菜,真係好想再食多次;至於個湯就真係略為遜色,飲到只係好普通嘅蘑菇湯,比較似係中湯多個似西湯。
難得唔係食蛋包飯Www


咁多然咁難得去到朝聖,咁就真係唔爭在試埋啲甜品。兩次我哋都係嗌咗芭菲,除咗裝飾得好精緻之外,下面個底亦都用咗涼粉(?)做底,都算係幾得意嘅體驗。


講完嘢食又講下女僕~ 


又係畫碟 
作為台灣元老級嘅女僕Cafe,放置play呢啲當然係唔會出現啦。雖然兩次幫襯期間都係大約下晝兩點後,當值女僕就預咗比較少,不過都唔會話因為呢個原因所以放置play。  由一行入門口個一刻開始,班女僕已經不停咁同你傾計,作為一個週末遠征組成員,真係有一種返到屋企嘅感覺。坐低嘅時候唔會先比Menu而係先介紹自己,然後再介紹有啲咩嘢食。落單之後因為要等比較長嘅時間,所以唔同嘅女僕都會主動走埋嚟同你傾計。食完之後,如果你未走嘅話都會繼續同你傾吓計先。 


另外,女僕會不定時表演唱歌,因為我掌握唔到佢表演時間,我兩次都見到,兩次都覺得自己好好彩。同埋係表演期間啲女僕會帶領氣氛,令到全場觀眾都可以樂在其中;而且女僕同女僕之間嘅互動好得意,算係一種與別不同嘅女僕Cafe體驗。

月讀御守(影完之後被fd搶走咗...傷心


19/2/2020

台灣女僕cafe體驗:台北 KIRABASE

作為一個經常出入不同女僕Cafe嘅人,都預咗係呢啲地方消費一定比普通餐廳為高。雖然都預咗消費會好高,但係呢度比我想像中仲要貴,不過如果一次半次我覺得都值得可以試吓。


花茶類飲品~
KIRABASE 位於三創生活園區,喺台北黎講亦都算係一間比較年輕嘅女僕Cafe,與其話唔容易搵到,不如話有一日佢開始已經見到好多招牌宣傳。正常女僕Cafe會封實晒唔好俾其他人睇到店入邊情況,不過因為KIRABASE 位於商場入邊,所以佢有一邊係有一大塊落地玻璃比其他人望到餐廳入邊情況。如果你唔係咁鍾意俾人望住食飯或者俾人望住你係女僕Cafe嘅話呢家未必係你嘅最佳選擇。(弦外之音:去得女僕Cafe就唔好怕羞,不過佢呢個其實算係某程度上羞恥play)  


份量偏細但幾好味~
店舖入邊擺位都幾特別,除咗左右兩邊有卡位之外,中間有幾排面向舞台嘅枱,有啲似以前讀書係Hall 全部人面對舞台嗰種坐法,真係幾少見吓。  


至於食物方面,老實講其實都有啲失望。先唔好講話價錢真係比正常女僕Cafe貴先,而係個份量真係比較偏細少少。雖然賣相真係好精緻,但真係幾啖就食完,真係有少少失望。因為其實味道幾好,如果有多少少就會比較好。飲品方面除咗有女僕特飲、奶昔之外,仲有提供一啲花茶類嘅飲品,相比起其他女僕Cafe,呢個真係幾特別嘅體驗。同埋飲落個味道都唔係好差,甚至可以媲美出邊一啲花茶專門店嘅出品,有機會真係值得試吓。  


講完啲食物又係時候講下啲女僕~  


又係畫碟時間~
雖然呢一間女僕Cafe佔地真係好大,可能係台北最大?(我估就算無最大都排頭幾位)但係女僕亦都好足夠。當初以為會放置play,但係好彩呢件事最後係無發生。由我地坐低到我哋離開嗰一刻,間唔中都有女僕走過來陪我地傾計玩下小遊戲嗰啲。雖然都有女僕同熟客喺度玩,而且我只係一個第一次幫襯嘅遊客,但係女僕之後都會過嚟招呼我哋,真係一個幾唔錯嘅體驗。  

另外,我諗呢一間除咗係女僕Cafe之外,我估亦都好着重舞台表演,睇佢啲座位安排已經覺得係,睇佢時間表大約每三十至六十分鐘左右就有表演或者同觀眾玩小遊戲。亦都好好彩地,上次有機會參與到兩節活動,第一節係問答遊戲,第二節係女僕表演唱歌環節。老實講淨係呢兩樣野已經值回票價,因為好少女僕Cafe會咁樣同客人打成一片,中間嗰種隔膜其實真係會消失咗,所以如果有機會真係值得幫襯,體驗一下比較唔同嘅女僕Cafe體驗。



(本文同時載於Medium)

17/2/2020

台灣女僕cafe體驗:台北 Kokorolia 心物語Maid Cafe

位於台北安利美特和虎之穴中間嘅 Kokorolia 心物語Maid Cafe,算係一間喺台北年紀比較年輕的女僕Cafe。雖然佢係一個比較新嘅女僕Cafe,但同其他女僕Cafe相比,絕對巾幗不讓鬚眉。

女僕特飲 
店舖門口左右兩邊擺滿不同的裝飾品,亦都睇唔到入邊,令到你有一種幻想嘅感覺,完全估唔到入邊嘅風格係點樣。一入到去,就覺得個環境好大好舒服,好彩有一早打電話訂位,一去到就可以即刻有位坐低。雖然鋪面好大,但係擺嘅枱唔多,令到每一枱客人之間有足夠嘅距離,唔會感到好侷促不安。

店舖入邊主要用可愛風格,整個裝修風格用上十分鮮明的色彩,相比起其他女僕Cafe,呢度少咗好多(應該話完全唔見有)書本或者動漫畫,取而代之嘅係有好多公仔喺度,例如有好多巨趴。同埋當有客人離開之後,女僕會擺條鯊魚係個位度,對於我呢啲咁鍾意軟綿綿嘅嘢嘅人來講,呢度絕對好啱我口味。(成個世界都係軟綿綿嘅嘢(^∇^)
超巨大嘅漢堡飽~

至於食物方面,絕對可以用King Size黎形容。雖然我哋幫襯嘅時間已經係下晝三點左右,不過因為我哋實在太肚餓所以帶咗個漢堡包加套餐,但係結果竟然係食唔晒。正常係女僕Cafe食嘢諗住唔會太大份,但係結果我呢度超乎我想像。套餐除咗沙律、餐湯之外,仲有提供主菜同甜品。沙律同餐湯就自由發揮,至於個漢堡包(千祈唔好同牡丹樓同K〇C比,因為絕對係兩個唔同Level),真係好大份,同埋牛肉亦都好大塊,一個成年男人絕對可以食得飽;至於甜品烤布甸就唔係好甜啱啱好。
甜品:烤布甸

食完野,又係時候講吓女僕~

我相信呢個世界係無十全十美,雖然啲食物真係好好食,不過啲女僕真係有少少放置play。可能見到因為我哋係遊客,所以唔係話唔理我哋,只係無其他顧客花咁多時間係我哋嗰度。互動嗰啲係有嘅,不過真係好少。不過可能因為我哋去嗰陣時當值女僕數量唔多,所以未能花大量時間招呼我哋,希望下次有機會去嗰陣時會改善。

不過講開又講,呢一間女僕Cafe嘅女顧客數目相比起其他係比較多,我幫襯嗰陣差唔多有一半嘅客人都係女性,可能因為呢間主要係走可愛風格,比較適合女性?
かわいい~~~
另外我希望有人可以答下我,究竟佢哋係有無即影即有服務?我見到好似可以買但餐牌上又唔見有,希望可以搵人解答到我(土下座


(本文同時載於Meduim)

15/2/2020

台灣女僕cafe體驗:台北 Crescendo 可蕾仙朵女僕咖啡館


位於捷運台電大樓旁邊,遠離台北車站等市中心區,如果要去除咗要考慮交通問題之外,可以嘅話就最好預約,因為試過有一次去到無預約喺門口等咗半個鐘先有位,但係等都唔緊要(有得去女僕Cafe,要我等幾耐都唔緊要),最大問題係附近無嘢行。  

一入去,就見到有兩層。第二層係類似閣樓的方式,所以就只有幾張枱。好遺憾地兩次都係坐二樓,一直未有機會喺坐到地下果層。其實二樓係有更好嘅,睇舞台表演就更好嘅視覺。不過如果你好似我呢啲身高180cm嘅人坐二樓應該會好辛苦,因為留底好矮,同埋唔知點解佢兩次坐兩樓都係無乜冷氣,覺得好焗。  

三文治
炸物拼盤
食物方面,其實我真係好遺憾一直試唔到佢嘅正餐。第一次去因為趕住去睇live,所以淨係叫咗輕食,第二次係因為做緊唔知乜嘢聯動,所以只有期間限定meun,試唔到餐牌上面嗰啲正餐,不過唔緊要。輕食我食咗三文治,老實講,你唔好預期會有啲咩好特別或者黑暗材料,俗啲咁講咪普通三文治加烘底,不過其實材料幾足夠。至於有聯動果次,我都係選擇了輕食,結果今次提供嘅係炸物拼盤。老實講,飽就唔會飽㗎啦,不過好彩同行有朋友想要聯動果啲禮物,所以都算值得。  

芭菲
既然都唔夠飽嘅時候,當然會叫多個甜品嚟食。結果都係選擇咗食芭菲。雖然都唔係平不過份量幾足夠。另外飲品方面,都算正常發揮,不過被同行朋友迫咗飲杯黑暗飲品,好彩啲女僕都幾有良心,唔係特別難飲。  

又到咗最主要問題,女僕?  

當初坐二樓諗住會放置play,結果係唔會。雖然坐二樓預咗同坐地下相比一定會少咗啲女僕互動,不過啲女僕都會主動走上黎搵你傾吓計,或者送食物嘅時候會由不同女僕負責,所以都唔怕無互動。送完食物之後其實都會同你傾一陣計先俾你食,完全唔怕悶親你。  

傳説中嘅女僕暗黑料理飲品
另外,幸好兩次都有人買女僕表演套餐,令到我都有機會觀賞到。雖然舞台唔係好大,不過睇得出班女僕真係好俾心機表演,應該用咗好多時間練習,睇得出佢哋真係好享受整個過程。有機會真係值得購買套餐睇一次表演,保證值回票價。

(本文同時載於Medium)

13/2/2020

台灣女僕cafe體驗:台北 萌姬女僕咖啡館

西門町,應該好多人都熟悉過我,所以都唔使特別介紹。位於台北捷運西門町站六號出口旁邊嘅萌姬女僕咖啡館,由捷運出口行去入都唔駛1分鐘,不過前提你要知道喺邊Www(第一次嗰陣我搵咗差唔多15分鐘(~_~) )  


如果唔係有心去幫襯女僕cafe,我諗好多人嘅目光會望咗去樓下嗰間燒肉放題店。萌姬女僕咖啡館位於商業大廈的六樓,但係地下門口就比間大型連鎖店遮住,真係要比少少心機先搵到。  



店舖呈T形,地方其實都算幾闊落,而且仲有個小型舞台可以供女僕表演,不過好似都係主要攞嚟影即影即有。不過唔知點解,雖然地方闊落,但係可能因為枱凳擺位問題,每張枱同通道之間嘅距離好窄,行嗰陣真係要格外小心,如果唔係好易撞到。  


食物方面其實都幾好食,因為都幾濃味,幾適合我哋香港人嘅口味。不過亦都因為咁樣,所以如果叫有黑椒或者辣嘅食物都幾辣下,不過如果你鍾意食辣你就會幾鍾意。  飲品同甜品方面,暨可以選擇單點,又可以選擇放題(不過只限汽水和雪糕,不過係兩個分開嘅,如果想享受晒兩個放題就需要比兩份錢。)不過唔知係唔係唔我唔好彩,幫襯過兩次,第一次就食唔到雪糕放題,第二次就汽水機壞咗淨係食到雪糕放題(>﹏<)汽水就唔使特別介紹,雪糕反而就幾得意,有啲好特別嘅味道提供。  


又到咗最重要問題,女僕呢?  


去過兩次,每次都有驚喜,平均都有四至五個女僕當值,當然其中一個係廚娘。女僕都會主動同你傾計,知道我係遊客之後都會同我傾下唔同嘅嘢,例如台北夜市去邊度好,相比起女僕,更加有一種朋友嘅感覺。如果人少嘅時候你仲可以見到女僕開直播同觀眾互動,更加有機會見到佢哋唱歌。不過如果係食套餐附送嘅影即影即有就有啲遺憾,因為係用畫鬼腳方式,所以只可以相信命運揀中邊個影合照。  


Happy Birthday to Me~
另外,慶幸有一次係生日前一日幫襯,check完生日日期之後,咁就可以攞到一份特別嘅禮物就係女僕用朱古力喺碟上面畫嘅生日祝福字句(如果可以攞走就好了Www),另外仲會有個用棉花糖製成嘅生日蛋糕?不過真係好甜。當然唔少得仲有女僕唱生日歌同你慶祝。不過有機會真係值得試一次係生日正日係女僕Cafe過。


(本文同時載於Medium)

11/2/2020

台灣女僕cafe體驗:台北 夢幻學園

台北地下街其實就有兩間女僕Cafe同一間執事Cafe(或者他朝有日我傻咗可能會去試吓執事Cafe嘅,不過最少唔係依家)。如果大家有上網做過 Research,大家可以都知道係同一個老細,所以其實係去其中一間都得(其實明知另外嗰間都差唔多,我都想去試,但係一直未試過見到佢開門,唯一有次見到佢開門不過趕住搭飛機所以幫襯唔到(˶‾᷄ ⁻̫ ‾᷅˵) )  





門口其實都有一啲特色,左右兩邊都有一個看版娘,除非你眼大睇過龍,唔係都幾肯定一定會見到。同埋如果見到有客人係門口睇Menu,通常都會好主動出黎介紹。  


首先講吓基本資料,店舖呈”L”形,地方和位置不多,但當值嘅女僕都唔多。去過兩次,第一次得一個女僕當值,第二次比較好彩,有兩個女僕當值。  


食物方面真係唔好有太大期望,雖然價錢算係中等價錢可以接受,但因為兩次幫襯都係平日嘅緣故,所以有好多食物都無。同埋就算有都好,如果正餐(eg:飯/意粉呢類食物)其實真係唔期待。唔係話唔好食,只係如果相同價錢係出邊食相同嘅嘢會好食好多,同埋就算係其他Maid Cafe 食相同嘅嘢都會好味過佢。飲品方面就正常自由發揮啦。 


不過我有一方面其實幾好,就係佢啲甜品。(雖然我就唔係好鍾意喺Maid Cafe入邊食甜品,因為我有選擇困難症Www)如果有機會呢間Maid Cafe啲甜品其實幾好食,尤其是佢啲蛋糕,好似問過係自家製,重點係甜度啱啱好,唔會話太甜。  


又到咗最重要嘅問題,咁啲女僕表現如何?  


Well,雖然就預咗有少少放置play,不過都算肯同你傾吓計。不過有一點要留意,就係佢哋無廚娘,你落完單之後,你預佢會放置play一段時間,因為佢要準備嘢食或者飲品俾你。(如果同一時間有幾枱客就睇下你好唔好彩啦,因為未必有足夠女僕招呼你(≧ω≦))另外埋單之後,佢會將找返嘅錢擺入信封入邊,如果好運嘅話仲會收到張咭仔,入邊寫咗啲:感謝您幫襯,希望下次再黎⋯⋯類似呢啲說話,都算係幾特別。

(本文同時載於Medium)

9/2/2020

台灣女僕cafe體驗:台中 時刻動漫SKR

實依家我唔知應唔應該算係女僕咖啡廳,因為佢個名入邊係無寫明自己係女僕Cafe。佢全名係”SKR時刻動漫餐廳”,雖然佢官方介紹有寫女僕,但係Facebook 介紹入面寫佢業務都幾廣泛。


Anyways,佢係一間點樣餐廳其實我唔介意,我淨係介意佢入邊啲服務嗰啲。好,唔講廢話,入正題。


其實門口唔係太起眼,行過咗其實都唔係好覺。一入去就見到有條樓梯,第一次去嗰陣仲傻下傻下企喺門口以為有人落嚟招呼我哋,結果原來係要自己行上去。上面就有地方唔係好大,不過有一種係酒吧嘅感覺,可能係因為一入去見到有吧枱。


請女僕係碟上畫公仔是常識吧Www

首先講吓個Menu,其實好有果嗰種去茶餐廳跟住張外賣紙嘅感覺,只係過咗膠Www如果以選擇黎講其實都係比較少,同埋正餐方面真係直接寫係啲咩嚟,雖然可以唔使估但係好似無乜特色。飲品同甜品方面啲名就真係正常自由發揮,唔好亂叫嘅話正常都唔會中伏。

嘢食同飲品方面其實質素係唔錯,份量其實都可以接受。不過,唔知點解黎過幾次,次次叫乜都好都係啲汁多飯,個汁仲要好稀,可能咖哩會好啲不過我仲未有機會試到。飲品就中規中矩啦。


講開又講,呢一間女僕Cafe同其他唔同嘅係需要俾咗錢先,同其他食完先俾錢有啲唔同。不過各處鄉村各處例,都算係一個幾特別嘅體驗。


至於大家最關注嘅,去得女僕Cafe其實就梗係啲女僕互動夠唔夠?



答案係:其實都幾夠。可能我哋幫襯嗰陣人數唔係好多,得兩至三枱客,有差唔多四個女僕當值緊,咁點完餐之後佢都主動埋嚟同我哋傾吓計,知道我地係遊客之後都問我地點解會揀喺呢度食飯同埋會介紹下附近嘅特色地方。之後食完之後又有第二個女唔過嚟同我地傾計。其實我想繼續傾落去,不過礙於時間不足所以坐咗大約個半鐘左右就走左。走之前仲喺我哋隻手度畫左個公仔留為紀念,所以都幾特別。

(本文同時載於Medium)